சிறிலங்கா: போரில் காணாமற்போன 600 சிறார்கள் என்னவானார்கள்?

சிறிலங்காவின் நீண்ட கால உள்நாட்டு யுத்தமானது நிறைவுக்கு வந்து இரு ஆண்டுகள் கடந்துள்ள நிலையிலும் 630 சிறார்கள் தொடர்பான விபரங்கள் அவர்களது இரத்த உறவுகளுக்குத் தெரியாதுள்ளதாக அரசாங்கத் தகவல் ஒன்றில் குறிப்பிடப்பட்டுள்ளது.

1983ல் தமிழ் நாடு கோரிப் போராட்டத்தை ஆரம்பித்த தமிழீழ விடுதலைப் புலிகளிற்கும் சிறிலங்கா அரச படைகளுக்கும் இடையில் இடம்பெற்ற நீண்ட கால யுத்தமானது நிறைவுக்குக் கொண்டுவரப்பட்ட மே18 2009 அன்று பெரும்பாலான தமிழ்ச்சிறார்கள் காணாமற்போயுள்ளனர்.
 
இச்சிறார்களில் 64 வீதமானோர் புலிகளின் சிறுவர் ஆட்சேர்ப்பின் போது புலிகள் அமைப்புடன் இணைக்கப்பட்டவர்கள் என யுனிசெப் அறிக்கையில் சுட்டிக்காட்டப்பட்டுள்ளது.

உள்நாட்டு யுத்தம் இறுதிக்கட்டத்தை அடைந்த போது 300,000 வரையிலான பொதுமக்கள் புலிகளின் கட்டுப்பாட்டிலிருந்த வன்னிப் பெருநிலப்பரப்பிலிருந்து வெளியேறி பாதுகாப்பான இடங்களுக்கு இடம்பெயர்ந்தனர்.

யுத்தத்தின் போது தமது சிறார்களைப் பிரிந்த பெற்றோர் தமது பிள்ளைகள் கிடைப்பார்கள் என்ற நம்பிக்கையில் பல இடங்களுக்கு அலைந்து திரிந்த வண்ணமுள்ளனர். "எனது பணியகத்திற்கு வெளியில் அழுதவண்ணமிருந்த அந்தப் பெண்கள் தமது பிள்ளைகளைத் தேடித்தருமாறு என்னிடம் கேட்டார்கள்" என வவுனியா மாவட்டத்தில் உள்ள மூத்த அரசாங்க அதிகாரியான பியன்சியா சாள்ஸ் தெரிவித்தார்.
 
காணாமற்போன பிள்ளைகளின் குடும்பங்களுடன் தொடர்புகளைப் பேணும் பொருட்டு 2009 டிசம்பரில் குழுவொன்று உருவாக்கப்பட்டதாக அவர் மேலும் தெரிவித்தார்.

"காணாமற் போனோர் தொடர்பான தகவல்களைப் பெற்றுக் கொள்வதென்பது மிகக் கடினமான விடயமாகும். இந்தச் சிறார்களைத் தேடிக் கண்டுபிடிப்பதற்குப் பொருத்தமான பொறிமுறை ஒன்றில்லை. இந்தச் சிறார்களின் பெற்றோர்கள் மிகவும் வேதனையுடன் வாழ்கிறார்கள்" என சாள்ஸ் மேலும் தெரிவித்தார்.

இச்சிறார்களைத் தேடிக் கண்டுபிடிப்பதற்கான மேலதிக ஆளணி வளங்கள், பயிற்சிகள், மற்றும் தரவுத் தளம் ஒன்றை உருவாக்குவதற்கான உதவிகள் என்பவற்றை யுனிசெப் நிறுவனம் மேற்கொள்கின்றது. இற்றைவரை இவ்வாறு காணாமற் போன சிறார்களில் 600 பேர் வரையானவர்கள் கண்டுபிடிக்கப்பட்டு அவர்களது பெற்றோர்களிடம் ஒப்படைக்கப்பட்டுள்ளனர்.
 
மேலும் 13 பேரது விபரங்கள் ஆராயப்பட்டு வருகின்றன. அத்துடன் 34 சிறார்களின் பெயர்கள் அவர்களது பெற்றோர்களால் தமது பிள்ளைகளைக் கண்டுபிடித்துத் தரும் பொருட்டு வவுனியாவில் செயற்படும் சிறார்களைத் தேடிக் கண்டுபிடித்து மீளக் குடும்பங்களுடன் இணைக்கும் பிரிவிடம் வழங்கப்பட்டுள்ளன.

இவ்வாறான சில செயற்பாடுகளின் பின்னர் தற்போது தமது சிறார்களைக் காணவில்லை என அலைந்து திரிந்த பெற்றோர்களின் தொகை குறைந்துள்ளது. ஆனாலும் இது தொடர்பான பணிகள் தொடர்ச்சியாக மேற்கொள்ளப்பட்டுவருவதாகவும் சாள்ஸ் தெரிவித்துள்ளார்.

வவுனியா நகரிலிருந்து 70 கிலோமீற்றர் தூரத்தில் அமைந்துள்ள ஆலங்குளம் கிராமத்தில் தற்போது  மீளக்குடியேறியுள்ள மூன்று பிள்ளைகளின் தாயாரான குலசேகரன் குகமதி 16 வயதுடைய தனது மூத்த மகனைப் பற்றிய எந்தவொரு செய்திகளும் கிடைக்காது மிகவும் வேதனையில் வாழ்கிறார்.

இந்த விதவைத் தாயின் மூத்த மகன் 2008ன் ஆரம்பத்தில் தமிழீழ விடுதலைப் புலிகளால் இணைக்கப்பட்டிருந்தார். சிறிலங்காவில் இடம்பெற்ற இறுதிக்கட்ட யுத்தத்தின் போது பல ஆயிரக்கணக்கான சிறுவர் போராளிகள் தமிழ்ப்புலிகளால் பலவந்தமாக அவர்களது படையில் இணைக்கப்பட்டிருந்தனர் என சிறுவர் போராளிகளை படையில் இணைப்பதை எதிர்க்கும் அமைப்பின் அறிக்கையில் குறிப்பிடப்பட்டுள்ளது.

"2008ம் ஆண்டிலிருந்து இன்னமும் நான் எனது மகன் தொடர்பான எந்தவொரு செய்திகளையும் அறியவில்லை. அவன் எங்காவாது உயிருடன் இருப்பான் என நான் நம்புகின்றேன். அவனைத் தேடுவதற்கான முயற்சிகளை நான் மேற்கொள்ளவேண்டும் என்பது எனக்குத் தெரியும். ஆனால் இதற்கான போதியளவு நேரமோ அல்லது பணவசதியோ என்னிடம் இல்லை" என 44 வயதான குலசேகரன் குகமதி என்ற இந்தத் தாய் தெரிவித்தார்.
 
காணாமற் போன சிறார்கள் தொடர்பான ஏதாவது தகவல்கள் தமக்குக் கிடைக்கும் பட்சத்தில், தரவுத்தளத்தில் உள்ள தகவல்களுடன் ஒப்பிட்டு அத்தகவல்கள் சரியாக இருந்தால் உரிய பெற்றோர்களுடன் அவர்களது பிள்ளைகளை மீள இணைத்துவிடுவதாக வவுனியாவிலுள்ள யுனிசெப் நிறுவனத்தின் சிறுவர் பாதுகாப்பு அதிகாரி சஜி தோமஸ் தெரிவித்தார்.

"எமது பிரிவில் சிறார்கள் தொடர்பான தகவல்கள் மட்டுமே முன்னுரிமைப்படுத்தப்பட வேண்டும் எனக் குறிப்பிடப்பட்டுள்ள போதிலும் ஏனைய காணாமற் போன இளையோர்களின் பெயர்களும் பதிவாகியள்ளன. இதுவரையில் 2000 வரையிலானவர்களின் பெயர்கள் எமது தரவுத்தளத்தில் பதிவாகியுள்ளன" என தோமஸ் மேலும் தெரிவித்தார்.

"இந்த இளையோர் தொடர்பான தகவல்களைத் தேடிக் கண்டுபிடிப்பதற்கான அமைப்பொன்றை உருவாக்கி அதனை நடைமுறைப்படுத்துவதற்குப் பொருத்தமான நிதி நிறுவனம் ஒன்றை நான் தற்போது தேடிக்கொண்டிருக்கிறேன். இவ்வாண்டின் இறுதிக்குள் இது தொடர்பான சாதகமான பதில் ஒன்றைப் பெற்றுக்கொள்ள முடியும் என நான் நம்புகின்றேன்" எனவும் அவர் மேலும் தெரிவித்தார்.

செய்தி வழிமூலம்: IRIN
மொழியாக்கம்: நித்தியபாரதி

Read More

சிறிலங்கா அதிபரால் நேரடியாக மிரட்டப்பட்ட ஊடகவிலாளர்

கொழும்பில் இருந்து வெளியாகும் 'சண்டே லீடர்' பத்திரிகையில் வெளிவந்த "சிறிலங்கா அதிபர் மற்றும் அவரது மகன் ஆகியோர் தனிப்பட்ட ரீதியில் செலவழிப்பதற்கென சீனா பெருந்தொகையான நிதியை வழங்கியுள்ளது" என்கின்ற செய்தியை அடுத்து யூலை 19 திகதியன்று தொலைபேசி மூலம் தொடர்பு கொண்ட சிறிலங்கா அதிபர் மகிந்த ராஜபக்ச இப்பத்திரிகையின் இயக்குனரான லால் விக்கிரமதுங்கவை அச்சுறுத்தியுள்ளதை எல்லைகளற்ற ஊடகவியலாளர் சங்கம் [Reporters Without Borders] கண்டித்துள்ளது.

"சிறிலங்கா அதிபர் தொலைபேசி மூலம் பத்திரிகையாளர்களுக்கு நேரடி அச்சுறுத்தல்களை விடுகின்ற செய்தியானது எமக்கு மிகவும் அதிர்ச்சியை ஏற்படுத்தியுள்ளது" எனவும் எல்லைகளற்ற ஊடகவியலாளர் சங்கம் விடுத்துள்ள கண்டன அறிக்கையில் தெரிவிக்கப்பட்டுள்ளது.
 
சிறிலங்காவில் வெளியிடப்படுகின்ற ஒரேயொரு சுயாதீன ஆங்கிலப் பத்திரிகையான சண்டேலீடர் பத்திரிகையானது சிறிலங்கா அதிபரின் அச்சுறுத்தலுக்கு உள்ளாகியுள்ளது.

சிறிலங்கா அதிபர் இப்பத்திரிகையில் வெளிவந்த செய்தி தொடர்பாக மறுப்புத் தெரிவிக்க விரும்பியிருந்தால், ஊடகங்களின் ஊடாக இதற்கான பதிலறிக்கை ஒன்றை விடுத்திருக்கலாம்.

இந்த விடயத்தை ஊடகங்கள் மூலம் தெளிவுபடுத்துவதே உண்மையில் ஜனநாயக வழிமுறையாகும்.

"சிறிலங்கா அதிபரின் பொறுப்பற்ற நடவடிக்கையை நாம் கண்டிக்கிறோம். ஒரு நாட்டினுடைய தலைவர் தனது மக்களுக்கு முன்னுதாரணமாகத் திகழவேண்டியவராவார். ஆனால் மகிந்த ராஜபக்ச மிகவும் கீழ்த்தரமான செயல்களில் ஈடுபட்டு வருகிறார். ஊடக சுதந்திரத்தில் தலையீடு செய்கின்ற தனது கொள்கையை மகிந்த ராஜபக்ச உடனடியாக மாற்றிக் கொள்ள வேண்டும்" என எல்லைகளற்ற ஊடகவியலாளர் சங்கத்தின் அறிக்கையில் குறிப்பிடப்பட்டுள்ளது.

"ராஜபக்சா குடும்பத்து உறுப்பினர்களால் ஊடகவியலாளர்கள் மிரட்டப்படுகின்ற சம்பவம் இது மட்டுமல்ல. இதற்கு முதலும் இவ்வாறான பல சம்பவங்கள் அரங்கேறியுள்ளன. ஊடகவியலாளர்களுக்கு எதிராக மேற்கொள்ளப்படுகின்ற இது போன்ற அச்சுறுத்தல் சம்பவங்களை உடனடியாகக் கைவிடுமாறு நாம் சிறிலங்கா அதிபர் மீத அழுத்தத்தைப் பிரயோகிக்கின்றோம். இவ்வாறான சம்பவங்கள் இடம்பெறுமிடத்து சிறிலங்காவிலுள்ள அனைத்து ஊடகங்களும் ஒன்று சேர்ந்து தமது கண்டனங்களைத் தெரிவிக்கவேண்டும் எனவும் எல்லையற்ற பத்திரிகையாளர் சங்கம், அனைத்து சிறிலங்கா ஊடகங்களிடமும் வேண்டிநிற்கின்றது" எனவும் அந்த அறிக்கையில் மேலும் தெரிவிக்கப்பட்டுள்ளது.  

யூலை 19 அன்று விக்கிரமதுங்க, சிறிலங்கா அதிபர் ராஜபக்சவிடமிருந்து தொலைபேசி அழைப்பைப் பெற்றுக்கொண்டபோது, அதிபரால் விடுக்கப்பட்ட மிரட்டல் செய்தி பின்வருமாறு:
 
"பொய்யான செய்திகளை பிரசுரிக்கிறீர்கள். இவை அனைத்தும் மூர்க்கத்தனமானவை. உங்களது செய்திகள் மூலம் அரசியல் ரீதியான தாக்குதல்களை என்மீது மேற்கொள்ள முடியும்.  நீங்கள் என்னைத் தனிப்பட்ட ரீதியில் தாக்க நினைத்தால், உங்களை எவ்வாறு தனிப்பட்ட ரீதியில் தாக்குவது என்பதும் எனக்கு நன்றாகத் தெரியும்"

'பொய் பேசவேண்டாம்', 'கடவுள் உங்களைத் தண்டிப்பார்' போன்ற வாசகங்கள் அடங்கிய நூற்றுக்கும் மேற்பட்ட துண்டுப்பிரசுரங்கள் சண்டேலீடர் பத்திரிகையின் தலைமைச் செயலக மதில்களில் ஒட்டப்பட்டிருந்தன.

சிறிலங்கா அதிபரின் தொலைபேசி மிரட்டல் மேற்கொள்ளப்படுவுதற்கு இரு நாட்களின் முன்னர் சண்டேலீடர் பத்திரிகையின் ஆசிரியர் பிறட்றிக்கா ஜான்ஸ் தனது பத்தியில், சீனாவானது சிறிலங்கா அதிபர் தனிப்பட்ட ரீதியில் செலவழிப்பதற்காக 09 மில்லியன் டொலர்களையும் அவரது மகனுக்கு அரை மில்லியன் டொலர்களையும் மானியமாக வழங்கியதாகவும் குறிப்பிட்டிருந்தார்.

இது தொடர்பான தெளிவான பதிலை சிறிலங்கா அதிபருக்கு வழங்கும் முகமாக சண்டேலீடர் பத்திரிகையின் நிர்வாகத்தால் எடுக்கப்பட்ட முயற்சிகள் அனைத்தும் தோல்வியில் முடிவடைந்துள்ளன.

சண்டேலீடர் பத்திரிகையானது நீண்டகாலமாக சிறிலங்கா அரசாங்கத்தால் குறிவைக்கப்பட்டுள்ள ஒரு பத்திரிகையாகும்.

லால் விக்கிரமதுங்காவிற்கு முன்னர் இப்பத்திரிகையின் இயக்குனராகச் செயற்பட்ட லசந்த விக்கிரமதுங்க 08,ஜனவரி 2009 அன்று படுகொலை செய்யப்பட்டார்.

இப்படுகொலை தொடர்பான எந்தவொரு விசாரணைகளும் முற்றுமுழுதாக நிறைவுசெய்யப்படவில்லை. இக்கொலையுடன் தொடர்புபட்ட எந்தவொரு குற்றவாளிகளும் நீதியின் முன் நிறுத்தப்படவில்லை.

லசந்த விக்கரமதுங்காவின் படுகொலை தொடர்பான முறையான விசாரணைகளை உடனடியாக  மேற்கொள்ளப்பட வேண்டும் என எல்லைகளற்ற ஊடகவியலாளர் சங்கம் மீண்டும் வலியுறுத்துகின்றது.

லசந்தவின் படுகொலையைத் தொடர்ந்து அவரது சகோதரனான லால் விக்கிரமதுங்க தற்போது இப்பத்திரிகையின் இயக்குனராகப் பொறுப்பேற்றுச் செயற்படுகின்றார். லால் விக்கிரமதுங்கவும் தற்போது குறிவைக்கப்பட்டுள்ளார்.

Read More

பரிதாபத்துக்குரிய ஈழத்தமிழர்களும் கஸ்மீர் பண்டிற்களும்

“இனச்சுத்திகரிப்பு என்பதும் இனப்படுகொலை என்பதும் ஒன்றல்ல. இது சிறிலங்காவின் வடக்கிற்கு நன்றாகப் பொருந்துகின்றது. ஆனால் கஸ்மீருக்கு பொருத்தமற்றது“ இவ்வாறு கஸ்மீர் பண்டிற்கள் எதிர்கொள்ளும் பிரச்சினையுடன் ஈழத்தமிழர் பிரச்சினையை
ஒப்பிட்டு அலசியுள்ளார்- மும்பையைத் தளமாகக் கொண்ட “daily news & analysis' ஊடகத்தின் ஆசிரியர் ஆதித்ய சின்ஹா.

அவரது இந்த ஆய்வை ‘புதினப்பலகை‘க்காக மொழியாக்கம் செய்தவர் நித்யபாரதி.

கஸ்மீர் பிரச்சினை தொடர்பாக அண்மையில் வெளியிடப்பட்ட- 'எனது சுதந்திரம் கிடைக்கும் வரை''- கஸ்மீரில் புதிய இன்ரிபடா மற்றும் சிக்கலான பிரச்சினை: ஜம்மு – கஸ்மீர்' ஆகிய இரு நூல்களிலும் இந்தியாவின் கஸ்மீர் மாநிலம் தொடர்பான பல்வேறு விடயங்கள் உள்ளடக்கப்பட்டுள்ளன.

கஸ்மீர் மக்கள் மிகவும் விரும்புகின்ற அந்த மாநிலத்தின் சுதந்திரம் தொடர்பாக இந்தியப் பழமைவாதிகள் எந்தவொரு அர்த்தமுள்ள கலந்துரையாடல்களையும் மேற்கொண்டிருக்கவில்லை என்பது தொடர்பாக இவ்விரு நூல்களிலும் விவாதிக்கப்பட்டுள்ளன.

கஸ்மீர் பண்டிற்கள்(Pandits) மற்றும் அவர்கள் தமது சொந்த இடத்தை விட்டு வெளியேறியமை தொடர்பான விடயம் இங்கே முதன்மைப்படுத்தப்படுகின்றது.

கஸ்மீர் இந்துக்கள் இந்தியாவிற்குள்ளே இடம்பெயர்ந்து வாழும் அதேவேளையில், ஜம்மு, டில்லி, மற்றும் இந்தியாவின் வேறு பல மாநிலங்களிலும் மிகத் துன்பகரமான நிலையில் வாழ்கின்றார்கள் என்பது மிகவும் கவலைக்குரிய விடயமாகும்.

சிறிலங்காத் தமிழர்களைப் போன்று கஸ்மீர் இந்துக்களின் நிலையும் மிகவும் பரிதாபத்திற்குரிய ஒன்றாக உள்ளது.

கஸ்மீரின் பழமைவாதிகள் அங்கு வாழும் இந்துக்கள் மீதான 'இனச்சுத்திகரிப்பு' தொடர்பாக ஏதாவது விவாதங்களை மேற்கொள்கிறார்களா என்றால் ஒருபோதும் இல்லை என்பதை அனைவரும் நினைத்துப் பார்க்க வேண்டும்.

ஆனால் இதற்கு மாறாக இவர்கள் கஸ்மீர் முஸ்லீம் மக்கள் தொடர்பாக மட்டும் தமது கருத்துக்களை கூறிவருகின்றனர். இது கஸ்மீர் இந்துக்களின் நிலைமையை பரிதாபத்திற்கு உள்ளாக்குகின்றது என்பதே சோகமானதாகும்.

ஜம்முவில் உள்ள மிஸ்றிவாலா முகாம் மற்றும் டில்லியிலுள்ள லஜ்பாட் நகர் முகாமைப் பார்வையிட்ட ஒரு சில பழமைவாதிகள் உட்பட அவர்களால் எழுதப்பட்ட ஆக்கங்களில் கஸ்மீர் இந்துக்களின் வாழ்க்கை சுயநலம்மிக்கது என்ற விடயத்தை வலியுறுத்தியே எழுதப்படுகின்றது.

'இனச்சுத்திகரிப்பிற்கு ஆளாக்கப்பட்டுள்ள ஏழு இலட்சம் கஸ்மீர் இந்துக்களின் நிலை என்ன?' என பத்திரிகையில் வெளிவந்த எனது ஆக்கத்தை வாசித்த சென்னையைச் சேர்ந்த ஒருவர் என்னிடம் தனது கடிதத்தின் மூலம் வினவியிருந்தார்.

1.42 லட்சம் பேரை உள்ளடக்கிய 38,119 குடும்பங்கள் கஸ்மீர் பிரச்சினையால் பாதிக்கப்பட்டு புலம்பெயர்ந்து வாழ்கின்றனர் என ஜம்மு - கஸ்மீர் விடுதலை ஆணையாளர் தெரிவித்துள்ளார்.

21,684 பண்டிற் குடும்பங்கள் தற்போது புலம்பெயர்ந்து வாழ்வதாகவும் இதில் அதிகமானோர் டில்லியில் வாழ்வதாகவும் தகவல்கள் தெரிவிக்கின்றன. 1989 இலிருந்து 219 கஸ்மீர் பண்டிற்கள் கொல்லப்பட்டுள்ளதாக அரசாங்கத் தகவல்கள் தெரிவிக்கின்றன.

சிறிலங்காவில் 28 ஆண்டுகளுக்கு முன்னர் இனவன்முறையானது ஆரம்பிக்கப்பட்டது.

சிறிலங்கா இராணுவத்தினருக்கும் தமிழீழ விடுதலைப் புலிகளிற்கும் இடையில் 2008-2010 வரை இடம்பெற்ற இறுதிக்கட்ட யுத்தத்தின் போது எண்ணுக்கணக்கற்ற தமிழ்ப் பொதுமக்கள் கொல்லப்பட்டனர்.

ஐக்கிய நாடுகள் சபையின் வல்லுனர் குழுவால் தயாரிக்கப்பட்டு வெளியிடப்பட்ட அறிக்கையில் 40,000 இற்கும் மேற்பட்ட தமிழ் மக்கள் கொல்லப்பட்டுள்ளனர் எனக் குறிப்பிடப்பட்டுள்ளது.

1983 இலிருந்து மூன்று இலட்சம் சிறிலங்காத் தமிழர்கள் புலம் பெயர்ந்து இந்தியாவில் வாழ்கின்றனர். புலம்பெயர் சிறிலங்கர்கள் மேற்கு நாடுகளிலேயே உள்ளனர். குறிப்பாக இரண்டு லட்சம் பேர் வரை கனடாவில் வாழ்கிறார்கள்.

தற்போது தமிழ்நாடானது சிறிலங்காத் தமிழர்களுக்கு ஆதரவுக்கரம் நீட்டுகின்றது. ஆனால் கடந்த சில ஆண்டுகளுக்கு முன்னர் இவ்வாறான நிலை காணப்படவில்லை.

சிறிலங்கர்கள் தமது நாட்டிற்கு சீனர்களை வரவழைத்ததன் பின்னர் இந்தியாவானது மிகவும் அச்சமுற்றுள்ளது. அத்துடன் சிறிலங்காவும் பாகிஸ்தானும் மிக நெருக்கமான உறவைப் பேணிவருகின்றன.

அண்மையில் தமிழ்நாட்டு சபைக்கான தேர்தலில் மு.கருணாநிதி தோல்வியுற்றது உள்ளடங்கலாக பல்வேறு தேசிய நலனைக் கருத்திற்கொண்டு இந்தியாவானது சிறிலங்கா விடயத்தில் அமைதி காத்து வருகின்றது.

ஒரு இனக்குழுமமானது பிறிதொரு இனக்குழுமத்தின் மீதோ அல்லது, ஒரு மதசார் குழுவானது பிறிதொரு மதசார் குழு மீதோ, தனது வன்முறைகளை அல்லது பயங்கரவாத நடவடிக்கைகளை கட்டவிழ்த்து விட்டு- அதன் ஊடாக பாதிக்கப்பட்ட இனக்குழுமத்தை அடியோடு வேரறுத்தலே இனச்சுத்திகரிப்பு எனப்படுகின்றது.

இங்கே குறிப்பிடப்படும் இனச்சுத்திகரிப்பு என்பதும் இனப்படுகொலை என்பதும் ஒன்றல்ல. இது சிறிலங்காவின் வடக்கிற்கு நன்றாகப் பொருந்துகின்றது. ஆனால் கஸ்மீருக்கு இது பொருத்தமற்றது.

இனச்சுத்திகரிப்பு என்பது கஸ்மீர் முஸ்லீம்களின் கொள்கையாக இருக்கவில்லை.

இந்த அடிப்படையில், கஸ்மீர் பண்டிற்களை மீண்டும் அவர்களது சொந்த இடங்களுக்கு அழைத்து அவர்களது வாழ்வை மீளப் புனரமைக்கும் நோக்குடன் அனைத்துக் கட்சி ஹுரியத் மாநாடு (All Parties Hurriyat Conference) கூட்டப்படுகின்றது.

கஸ்மீரில் இடம்பெற்ற மிகப் பெரும் இடப்பெயர்வுகளின் போது அங்கு வாழும் எல்லா சமூகங்களும் பாதிப்பிற்குள்ளாகியுள்ளன.

கஸ்மீர் பண்டிற்கள் மற்றும் கஸ்மீர் முஸ்லீம் சமூகத்தவர்கள் மிகவும் வசதிப்பாடுகள் குறைந்த வீடுகளில் மன அழுத்தங்களுடன் தமது வாழ்வைக் கழிக்கிறார்கள்.

இவ்விரு சமூகத்தவர்களின் உடல், உளப் பாதிப்புக்கள் ஒன்றாக இருக்கின்ற போதிலும், கஸ்மீர் முஸ்லீம்களின் உயர் வகுப்பு சமூகத்தவர்கள் மட்டும் சொகுசாக வாழ்கிறார்கள்.

இதற்கு நல்லதோர் எடுத்துக்காட்டாக பத்திரிகைத்துறை உள்ளது. 1990 களுக்கு முன்னர் இந்திய தேசிய பத்திரிகைகள் கஸ்மீர் இந்துக்கள் தொடர்பான செய்திகளையே அதிகம் முதன்மைப்படுத்தினர்.

ஆனால் தற்போது முஸ்லீம்கள் இங்கே அதிகம் பிரதிநிதித்துவப்படுத்தப்படுகின்றனர்.

இதேபோன்றே, உள்ளுர் நிர்வாகம் மற்றும் சுகாதாரத்துறை போன்றவற்றிலும் முஸ்லீம்களே அதிகம் பிரதிநிதித்துவப்படுத்தப்பட்டுள்ளார்கள்.

கஸ்மீர் பண்டிற்களின் தொகை குறைவாக இருந்தபோதிலும், ஒப்பீட்டளவில் சிறிலங்காவில் வாழும் தமிழர்களை விட தமது சொந்த இடத்தில் இவர்கள் அதிக பயன்களைப் பெறுகின்றனர்.

Read More

அரச தொலைக்காட்சி ஊடகவியலாளரே போர்க்குற்ற காணொலிகளை இரகசியமாக விற்றாராம்

சிறிலங்கா அரசாங்கத் தொலைக்காட்சி ஊடகவியலாளர் மூலமே சனல்-4 தொலைக்காட்சிக்கு போர்க்குற்றக் காணொலிகள் கிடைத்துள்ளன. ஐ.நாவுக்கான சிறிலங்காவின் பிரதி நிரந்தர வதிவிடப் பிரதிநிதி மேஜர் ஜெனரல் சவீந்திர சில்வா வெளியிட்டுள்ள தகவலில் இருந்து இது உறுதியாகியுள்ளதாக கொழும்பு ஊடகம் ஒன்று தகவல் வெளியிட்டுள்ளது.

2009 மே 17ம் நாள், போர் முடிவுக்கு வருவதற்கு நான்கு நாட்கள் முன்னதாக, விடுதலைப் புலிகளால் மனிதக்கேடயங்களாக வைக்கப்பட்டிருந்த இலட்சக்கணக்கான மக்கள் மீட்கப்பட்டது குறித்த காணொலியை ரூபவாகினி மற்றும் ஐரிஎன், சுவர்ணவாகினி ஆகியவற்றில் ஒளிபரப்புமாறு உத்தரவிட்டதாக மேஜர் ஜெனரல் சவீந்திர சில்வா கூறியுள்ளார்.

உள்ளூர் அலைவரிசைகளில் ஒளிபரப்பான இந்த காட்சிகள் அடங்கிய காணொலியில் நிச்சயமாக அந்த தொலைக்காட்சிகளின் சின்னங்கள் இடம்பெற்றிருக்கும்.

ஆனால் ஜுலை 27ம் நாள் சனல் -4 தொலைக்காட்சி ஒளிபரப்பிய காணொலியில் உள்ளூர் தொலைக்காட்சிகளின் சின்னங்கள் இருக்கவில்லை.
அதில் சனல்-4 தொலைக்காட்சியின் சின்னம் மட்டுமே இருந்தது.

இதிலிருந்து உள்ளூர் தொலைக்காட்சிகளுக்காக ஒளிப்பதிவு செய்யப்பட்ட காணொலிகள் பிரதி எடுக்கப்பட்டு சனல்-4 தொலைக்காட்சிக்கு விற்கப்பட்டுள்ளது உறுதியாகியுள்ளது என்றும் மேஜர் ஜெனரல் சவீந்திர சில்வா குறிப்பிட்டுள்ளார்.

அரசாங்க தொலைக்காட்சி குழுவினரே போர்க்களக் காட்சிகளைப் படம்பிடிக்க அனுமதிக்கப்பட்டிருந்தனர் என்பது குறிப்பிடத்தக்கது.

அதேவேளை, தன் மீதும் உயிரை பணயம் வைத்து போர்க்களக் காட்சிகளை பதிவு செய்த ருபவாகினி ஊடகவியலாளரான சமன்குமார  ராமவிக்கிரம மீதும் சிலர் சேறு பூச முனைவதாகவும் மேஜர் ஜெனரல் சவீந்திர சில்வா குற்றம்சாட்டியுள்ளார்.

சிறிலங்கா அரசாங்க தொலைக்காட்சிகளில் ஒளிபரப்பான காட்சிகளின் மூலப்பிரதி சனல்- 4 தொலைக்காட்சிக்கு எவ்வாறு கிடைத்தது என்ற கேள்வி எழுந்துள்ள நிலையில்- அந்தக் காட்சிகளைப் படம்பிடித்த அரச தொலைக்காட்சி ஊடகவியலாளர் ராமவிக்கிரமவே அவற்றை வெளிநாட்டு தொலைகாட்சிகளுக்கு விற்றிருப்பது உறுதியாகியுள்ளதாக கொழும்பு ஊடகம் ஒன்று குறிப்பிட்டுள்ளது.

அதேவேளை, சமன்குமார ராமவிக்கிரம போர்முனையில் இருந்து திரும்பிக் கொண்டிருந்த போது புலிகளின் பல மடிக்கணினிகளையும் இலத்திரனியல பொருட்களையும் தனது வாகனத்தில் திருடிக் கொண்டு சென்றபோது மதவாச்சியில் வைத்து கைது செய்யப்பட்டிருந்தார்.

அவரை அரசாங்க தகவல் திணைக்களப் பணிபாளர் லக்ஸ்மன் ஹுலுகல்லவே தலையிட்டு விடுவித்திருந்தார் என்பதும் குறிப்பிடத்தக்கது.

Read More

குகநாதன் மீதான தாக்குதல்- கொழும்பில் எதிர்ப்புப் போராட்டம்

யாழ்ப்பாணத்தில் உதயன் செய்திஆசிரியர் குகநாதன் தாக்கப்பட்டதற்கு எதிராக கொழும்பில் இன்று போராட்டம் ஒன்று நடத்தப்பட்டுள்ளது.

கொழும்பு லிப்டன் சுற்றுவட்டத்தில் இன்று காலை தொடக்கம் பிற்பகல் வரை நடத்தப்பட்ட போராட்டத்தில் பல்வேறு ஊடக அமைப்புகளையும் சேர்ந்த ஊடகவியலாளர்கள் கலந்து கொண்டு எதிர்ப்பு முழக்கங்களை எழுப்பினர்.

சிறிலங்கா உழைக்கும் பத்திரிகையாளர் சங்கம், சுதந்திர ஊடக இயக்கம், இலங்கை தமிழ் ஊடகவியலாளர் சங்கம்,சிறிலங்கா முஸ்லிம் ஊடக அமைப்பு, ஊடக ஊழியர் தொழிற்சங்கங்களின் சம்மேளனம்,ஜனநாயகத்துக்கான ஊடக அமைப்பு ஆகியவற்றின் உறுப்பினர்கள் இந்தப் போராட்டத்தில் பங்கேற்றனர்.

இந்த ஆர்ப்பாட்டத்தில் ஐதேக நாடாளுமன்ற உறுப்பினர்கள் தயாசிறி ஜெயசேகர, மங்கள சமரவீர, தமிழ்த் தேசியக் கூட்டமைப்பின் நாடாளுமன்ற உறுப்பினர் எஸ்.சிறிதரன், புதிய இடதுசாரி முன்னணியின் தலைவர் கலாநிதி விக்கிரமபாகு கருணாரட்ன, மனோ கணேசன், அனோமா பொன்சேகா ஆகியோரும் ஊடகவியலாளர்கள் உள்ளிட்ட பலரும் கலந்து கொண்டனர்.

Read More

இந்திய எதிர்கட்சித் தலைவர் சுஸ்மா சிவ்ராஜ் யாழ்ப்பாணம் வருகிறார்

இந்தியாவின் எதிர்க்கட்சித் தலைவர் சுஸ்மா சிவ்ராஜ் அடுத்தமாதம் சிறிலங்காவுக்குப் பயணம் மேற்கொள்ளவுள்ளார்.

அவர் செப்ரெம்பர் 17ம் ,18ம் நாட்களில் சிறிலங்காவுக்குப் பயணம் மேற்கொள்ளவுள்ளதாக, புதுடெல்லித் தகவல்கள் தெரிவிக்கின்றன.

புதுடெல்லியில் நேற்று சிறிலங்கா சபாநாயகர் சமல் ராஜபக்சவை சந்தித்த பின்னர் சுஸ்மா சிவ்ராஜ் இந்தத் தகவலை ஊடகங்களிடம் வெளியிட்டுள்ளார்.

தனது சிறிலங்காவுக்கான பயணத்தை யாழ்ப்பாணத்துக்குச் செல்வதற்குப் பயன்படுத்திக் கொள்ளப் போவதாகவும் சுஸ்மா சிவ்ராஜ் கூறியுள்ளார்.

Read More

சமல் ராஜபக்ச குழுவினருக்கு இந்திய நாடாளுமன்றத்தில் எதிர்ப்பு

சமல் ராஜபக்ச தலைமையிலான சிறிலங்காவின் நாடாளுமன்றக் குழுவுக்கு எதிராக இந்திய நாடாளுமன்றத்தில் அதிமுக உறுப்பினர்கள் போராட்டம் ஒன்றை நடத்தியுள்ளனர்.

இந்திய நாடாளுமன்ற சபாநாயகரின் அழைப்பை ஏற்று சிறிலங்கா சபாநாயகர் சமல் ராஜபக்ச தலைமையிலான நாடாளுமன்றக் குழுவொன்று ஐந்து நாள் பயணமாக நேற்று புதுடெல்லி சென்றது.

இந்தக் குழுவினர் இன்று இந்திய நாடாளுமன்றத்துக்கு சென்றிருந்தனர்.

சபாநாயகருக்கு அருகே அமைக்கப்பட்டிருந்த சிறப்பு ஆசனங்களில் அமர்ந்த சிறிலங்கா குழுவினரை வரவேற்று சபாநாயகர் மீரா குமார் அறிக்கை ஒன்றை வாசித்த போது அதிமுக உறுப்பினர்கள் செம்மலை, முனுசாமி, தம்பித்துரை ஆகியோர் வெட்கம்... வெட்கம் என்று உரக்கக் குரல் எழுப்பி எதிர்ப்புத் தெரிவித்தனர்.

இதையடுத்து அதிமுக உறுப்பினர்கள் ஒன்பது பேரும் சேர்ந்து கொண்டு சிறிலங்கா அரசுக்கு எதிரான முழக்கங்களை எழுப்பியதுடன் மேசைகளில் தட்டி எதிர்ப்பை வெளிப்படுத்தினர்.

இவர்களுடன் இந்திய கம்யூனிஸ்ட் கட்சி உறுப்பினர் பி.லிங்கமும் இணைந்து கொண்டு சிறிலங்கா அரசுக்கு எதிராக முழக்கங்களை எழுப்பினார்.

Read More

பொதுமக்கள் கொல்லப்பட்டதை அதிகாரபூர்வமாக ஏற்றுக் கொண்டது சிறிலங்கா

சமல் ராஜபக்ச தலைமையிலான சிறிலங்காவின் நாடாளுமன்றக் குழுவுக்கு எதிராக இந்திய நாடாளுமன்றத்தில் அதிமுக உறுப்பினர்கள் போராட்டம் ஒன்றை நடத்தியுள்ளனர்.

இந்திய நாடாளுமன்ற சபாநாயகரின் அழைப்பை ஏற்று சிறிலங்கா சபாநாயகர் சமல் ராஜபக்ச தலைமையிலான நாடாளுமன்றக் குழுவொன்று ஐந்து நாள் பயணமாக நேற்று புதுடெல்லி சென்றது.

இந்தக் குழுவினர் இன்று இந்திய நாடாளுமன்றத்துக்கு சென்றிருந்தனர்.

சபாநாயகருக்கு அருகே அமைக்கப்பட்டிருந்த சிறப்பு ஆசனங்களில் அமர்ந்த சிறிலங்கா குழுவினரை வரவேற்று சபாநாயகர் மீரா குமார் அறிக்கை ஒன்றை வாசித்த போது அதிமுக உறுப்பினர்கள் செம்மலை, முனுசாமி, தம்பித்துரை ஆகியோர் வெட்கம்... வெட்கம் என்று உரக்கக் குரல் எழுப்பி எதிர்ப்புத் தெரிவித்தனர்.

இதையடுத்து அதிமுக உறுப்பினர்கள் ஒன்பது பேரும் சேர்ந்து கொண்டு சிறிலங்கா அரசுக்கு எதிரான முழக்கங்களை எழுப்பியதுடன் மேசைகளில் தட்டி எதிர்ப்பை வெளிப்படுத்தினர்.

இவர்களுடன் இந்திய கம்யூனிஸ்ட் கட்சி உறுப்பினர் பி.லிங்கமும் இணைந்து கொண்டு சிறிலங்கா அரசுக்கு எதிராக முழக்கங்களை எழுப்பினார்.

Read More

சனல்-4 குற்றச்சாட்டுக்கு எதிராக சிறிலங்கா வெளியிட்டுள்ள காணொலி

போரின் இறுதிக்கட்டத்தில் சிறிலங்காப் படையினரால் போர்க்குற்றங்கள் இழைக்கப்பட்டதாக சனல்-4 தொலைக்காட்சி சுமத்தி வரும் குற்றச்சாட்டுகளை நிராகரிக்கும் வகையிலான காணொலி ஒன்றை சிறிலங்கா பாதுகாப்பு அமைச்சு நேற்று வெளியிட்டுள்ளது.

‘Lies Agreed Upon‘ என்ற தலைப்பிலான இந்தக் காணொலி 58 நிமிட நேரத்தைக் கொண்டது.

இந்தக் காணொலியில், போரின் மருத்துவமனைகள் மீது ஷெல் தாக்குதல்கள் நடத்தப்பட்டதான குற்றச்சாட்டை நிராகரிக்கும் வகையில் போர் வலயத்தில் பணியாற்றிய தமிழ் மருத்துவர்கள் கூறிய கருத்துகளும், ஆயுதம் ஏந்தாத எவரும் கொல்லப்படவில்லை என்று அங்கிருந்த பொதுமக்கள் சிலர் வெளியிட்டுள்ள கருத்துகளும் உள்ளடக்கப்பட்டுள்ளன.

அத்துடன் கொலை செய்யப்பட்ட தமிழ்த் தொலைக்காட்சி ஊடகவியலாளர் இசைப்பிரியா ஒரு போராளி என்றும் இந்தக் காணொலியில் வலியுறுத்தப்பட்டுள்ளது.

போர்க்குற்றச்சாட்டுகளுக்கு நேரடியாகப் பதில் கூறும் வகையில் இந்தக் காணொலி தயாரிக்கப்படவில்லை என்று கூறப்பட்டுள்ள போதும், சனல்-4 இன் குற்றச்சாட்டுகளை நிராகரிக்கும் வகையிலான பரப்புரைகளே இதில் அடங்கியுள்ளன.

சிறிலங்கா பாதுகாப்பு அமைச்சு இந்தக் காணொலியை வெளியிட்டுள்ளது குறித்து கருத்து வெளியிட்டுள்ள அனைத்துலக ஊடகம் ஒன்று இதனை ‘காணொலிப் போர்‘ என்று வர்ணித்துள்ளது.

Read More

கடவுளுக்கு நிகரானவர் ரஜினி-ஜூம் டிவி புகழாரம்

ஜூம் சூப்பர் நோவா 2010 டாப் 50 பட்டியலில் ரஜினி-கடவுளுக்கு நிகரானவர் என புகழாரம்!

பாலிவுட்டின் டாப் 50 பிரபலங்களின் பட்டியலை இன்று வெளியிட்டுள்ளது ஜூம் டிவி. இது டைம்ஸ் ஆப் இந்தியா குழுமம் நடத்தும் பொழுதுபோக்கு சேனல்.

ஜூம் சூப்பர்நோவா பட்டியல் எனும் பெயரில் இந்த ஆண்டு முதல் 50 விவிஐபிகளைப் பட்டியலிட்டுள்ளது அந்த சேனல். இதில் டாப் 10 பட்டியலில் சூப்பர் ஸ்டார் ரஜினியின் பெயர் இடம்பெற்றுள்ளது.

இதில் மூன்றாவது இடத்தில் அவர் பெயரை வைத்துள்ளது ஜூம் டிவி. 'ரஜினியைப் பொருத்தவரை அவர் கடவுளுக்கு நிகராகப் பார்க்கப்படுபவர்' என்றும் குறிப்பிட்டுள்ளனர் ('Rajinikanth who is a demigod unto himself').

முதலிடத்தை சல்மானுக்கும் இரண்டாம் இடத்தை அமீர் கானுக்கும் வழங்கியுள்ளது இந்த பாலிவுட் சேனல். ஷாரூக் கான் 4வது இடத்திலும், ஏஆர் ரஹ்மான் 5வது இடத்திலும், அமிதாப் பச்சன் 6 வது இடத்திலும் உள்ளனர். இந்தப் பட்டியலில். இந்த டாப் 10 -பட்டியலில் இடம்பெற்றுள்ள ஒரே பெண் கத்ரீனா கைப். ஐஸ்வர்யா ராய்க்கு 14வது இடம் கிடைத்துள்ளது.

தென்னிந்தியாவிலிருந்து ரஜினியும் ரஹ்மானும் மட்டுமே இதில் இடம்பெற்றுள்ளனர்.Topics: rajini, supernova top 50, zoom, ரஜினி, ஜூம் டிவி

Read More